अर्घाखाँची जिल्लाको एक मात्र सरकारी स्वास्थ्य संस्थाको रूपमा रहेको अर्घाखाँची अस्पताल सन्धिखर्क नगरपालिका वडा नं. १ मा अवस्थित छ। यस जिल्लामा औपचारिक एवं संस्थागत स्वास्थ्य सेवाको सुरुवात गर्ने उद्देश्यका साथ मिति २०४५ साल पौष २७ गते तत्कालीन स्वास्थ्य चौकीलाई स्तरोन्नति गरी १५ शैयाको जिल्ला अस्पतालका रूपमा यसको स्थापना भएको हो। अस्पतालको व्यवस्थित पूर्वाधार निर्माणका लागि सन्धिखर्कमा ३२ रोपनी जग्गा प्राप्त गरिएको थियो भने यस अस्पतालको प्रथम चिकित्सकको रूपमा डा. पुरनमान बज्राचार्यले सेवा प्रदान गर्नुभएको थियो। जिल्लावासीलाई गुणस्तरीय र आधुनिक स्वास्थ्य सेवा पुर्याउने क्रममा आर्थिक वर्ष २०७०/७१ देखि नेपाल सरकार र निक साइमन्स इन्स्टिच्युटको संयुक्त साझेदारीमा विस्तृत आकस्मिक प्रसूति तथा नवजात शिशु स्याहार (CEONC) सेवा प्रारम्भ गरियो, जुन हालसम्म पनि निरन्तर सञ्चालनमा छ।
अस्पताललाई ५० शैयाको अस्पतालमा स्तरोन्नति गरिएसँगै अस्पतालमा सेवा विस्तार र आधुनिकीकरणको नयाँ युगको सुरुवात भयो। अस्पताल प्रयोगशाला, एक्स-रे, र फार्मेसी सेवालाई चौबीसै घण्टा उपलब्ध गराउन थालियो भने अस्पतालको प्रशासनिक तथा सेवा प्रवाहलाई व्यवस्थित बनाउन इलेक्ट्रोनिक कम्प्युटर प्रणाली र विभिन्न विभागहरूमा विशिष्ट सफ्टवेयर जडान गरियो।
यसका साथै विपन्न तथा असहाय बिरामीहरूलाई राहत पुर्याउन सामाजिक सेवा एकाइ (SSU) को स्थापना, आधुनिक शल्यक्रिया कक्ष (OT) को सुदृढीकरण र जटिल प्रसूति सेवामा उल्लेख्य वृद्धि गरिएको छ। सर्वसाधारणको सहजताका लागि छुट्टै आँखा वहिरङ्ग (Eye OPD) सेवा, अस्पतालको आफ्नै शवगृह र एम्बुलेन्स सेवा समेत सञ्चालनमा ल्याइएको छ। प्रयोगशालामा पूर्ण रूपमा स्वचालित अत्याधुनिक उपकरणहरू जडान गरिनुका साथै अस्पतालको आन्तरिक सुरक्षा र चुस्त सञ्चारका लागि सीसीटीभी क्यामेरा र इन्टरकम प्रणाली समेत जडान गरिएको छ। अर्घाखाँची अस्पताल जिल्लाकै अग्रणी स्वास्थ्य संस्थाका रूपमा दक्ष जनशक्ति, आधुनिक प्रविधि र सेवाभावका साथ सम्पूर्ण नागरिकको स्वास्थ्य सुरक्षाका लागि सदैव प्रतिबद्ध रहेको छ।
